أحبك

أحبك ماهي بس كلمة على شفاهي أرددها

أحبك كلمة لا قلتها أقصد معانيها


صحيح حروفها أربع .. إذا ودك تعددها
ولكن المعاني ما أظن إنك بتحصيها


وفا، واخلاص، وظروف تعاندني وأعاندها
مشاعر صادقة والود ساكن في محانيها


غرام وشوق والغيره تبددني وابددها
هيام وعشق ولحون الغلا للوصل أغنيها


حنان يشتت ألأوهام عن السر جوف يبعدها
وداد وزوبعة هاجس على ذكراك طاريها


وئام ونية بيضا عن الهفوات مبعدها
وصراحة من جرائتها بدى التجريح يطويها


وله مجنون لعيونك حتى لو أشاهدها
وخيال يسكنه طيفك وحلم صورتك فيها


ولع يجتاحني ،، وهموم فيني مات قايدها
ونزوه من عتب لين طراوتها تحليها


شجون وتضحية عظمى وسوالف ليل جاحدها
واحاسيس مثل وبل المطر للروح تحييها


ولهفة عاشق لأجلك حدود الموت ياردها
وأمل لجله قصرت دروب قد طالت خطاويها


حنين وكبرياء وغطرسة عذال أجاهدها
وأماني تكسر الهامة، ولكن ماتوطيها


عواطف عطرها عم الحشا والشوق سايدها
وعبرة وسمت خدين وصارت من مواريها


ورغبة يغتصبها الوقت يهدمها واشيدها
وهيبة مصطنعها لك ولا ادري كيف أبنهيها


طلاسم من شكوك وظن ونشوة خوف أقيدها
وثقة عميا، يكحلها العفاف ولا يبكيها


قضت كل الحروف بشرح أحبك قوم واجردها
وانا كلمة أحبك ما بعد وضحت خافيها


عرفت الحين وش معنى أحبك يوم أرددها
عرفت إني أرددها وانا قصدي معانيها

عرفت ياحياتي وش كثر احبك...أحبك